Општина Центар во соработка со Здружението на граѓани ОРТ - Скопје и ЈП „Комунална хигиена“ почна со спроведување на проект за собирање отпадна пластична амбалажа и нејзина преработка.

Проектот „Собери ПЕТ да добиеш 5“ има за цел намалување на пластичниот отпад од вкупниот отпад во депонијата Дрисла.

Проектот ќе се спроведува 14 месеци, а е поддржан од ГЕФ проектот за мали грантови, Македонија. Во рамки на проектот ќе се спроведе организирано собирање на пластични шишиња во одредени пунктови во секое училиште и транспорт до фирма за преработка, едукативни работилници, настани за одбележување на еколошки празници и наградни игри и натпревари помеѓу училиштата.

За сите училишта обезбедени се термо - преси за пресување на пластични шишиња, за намалување на волуменот, пред нивното одлагање и транспортирање до фирмата за преработка.

Со проектот, се воспоставува организиран и затворен систем за третман на пластичниот отпад, од неговото собирање, намалување на волуменот и преработка до секундарни суровини.

Средствата од продажбата на пластичниот отпад, според собраната количина ќе бидат префрлени на основните училишта за обнова на училиштата или купување на училишни материјали и прибор за настава.